Кавани како политичар: Погледнете ја дипломатската изјава на Кавани во врска со Нејмар

Конфликтот помеѓу Едисон Кавани и Нејмар е главна тема на француските, но и на европските медиуми во последно време.

Нејмар и Кавани имаа неколку несогласувања на тренинзите на ПСЖ, но и во текот на натпреварите. Секако, најпозната е нивната караница за изведување на пеналот. Нејмар е тој кој сака да ги изведува пеналите, но Кавани не му дозволи што очигледно го налути Нејмар кој пристигна во Париз да биде првата ѕвезда на клубот.

Сепак, изгледа дека работите колку толку се смирени, а тоа можеше да се види и за време на синоќешниот натпревар во Лигата на Шампионите против Баерн Минхен. ПСЖ славеше со 3:0, а Кавани и Нејмар често се гушкаа и смешкаа еден на друг за време на натпреварот. Уругвајскиот напаѓач по натпреварот беше прашан за односот со Нејмар, а даде многу дипломатски одговор.

„Сите сме различни. Сите имаме различен начин на живеење и поглед на работите. Но, кога сме на теренот, сите работиме како едно семејство, за да ги исполниме заедничките цели, а тоа се победите“, изјави Кавани.

Потсетуваме, двајцата фудбалери синоќа се запишаа во листата на стрелци, а исто така брилијантен беше и Мбапе, кој направи многу проблеми во одбраната на гостите.