И Агуеро за поразот ги обвинува судиите и ВАР

Аргентина синоќа беше поразена од Бразил со 2:0 во полуфиналето на Копа Америка, а натпреварот имаше и трето полувреме.

Имено, при вториот погодок на Бразилците му претходеше спорна ситуација во нивниот шеснаесетник каде беше срушен Серхио Агуеро, но судијата ништо не досуди, ниту ја гледаше ВАР снимката.

Следуваше големо незадоволство кај Аргентинците кое продолжи и после натпреварот, а најгласен беше капитенот Лео Меси.

Серхио Агуеро исто така не го криеше своето незадоволство, па после натпреварот ја коментираше ситуацијата која веројатно на крајот беше пресудна.

„Не е добро чувството, вториот гол беше контроверзен. ВАР до денеска работеше добро. Неверојатно.“

„Не знам зошто не ја проверија ситуацијата. Во тоа време судијата можеби не виде, но затоа ВАР требаше да биде петти судија.“ – изјави незадоволниот Агуеро.