Европската Суперлига повторно се формира?Сега со 80 клубови и никој ќе нема сигурно место

Европската фудбалска Суперлига би можела да биде составена од 80 клубови во формат кој би се играла во повеќе дивизии, изјави извршниот директор на тоа натпреварување, Бернд Рајххарт.

Натпреварувањето би се базирало само на спортски резултати, без постојани членови, а на секој тим би му се гарантирале најмалку 14 натпревари по сезона, изјави Рајххарт за германскиот весник „Велт“, пренесе Скај.

Компанијата „А22“, која беше формирана да спонзорира и да помогне во формирањето на Супер лигата, консултираше речиси 50 европски клубови од октомври минатата година и разви десет принципи врз основа на тие консултации, за да создаде лига со нов изглед.

„Основите на европскиот фудбал се во опасност да пропаднат. Време е за промена. Клубовите се тие кои го носат претприемачкиот ризик во фудбалот. Но, кога станува збор за важни одлуки, тие се премногу често принудени да седат настрана додека финансиските основи се распаѓаат околу нив“, напиша Рајхарт за Велт.

„Нашите разговори јасно покажаа дека често не е можно клубовите јавно да зборуваат против системот кој се заканува со санкции за да ја спречи другата страна. Нашиот дијалог отсекогаш бил отворен, искрен, конструктивен и резултирал со јасни идеи за тоа какви промени се потребни и како тие може да се спроведат. Има многу да се направи и ќе продолжиме со нашиот дијалог“, додаде тој.

„А22“ го оспори правото на Европската фудбалска унија (УЕФА) и на Меѓународната фудбалска асоцијација (ФИФА) да го спречат формирањето на Супер лигата и да ги казнат конкурентските клубови на суд, тврдејќи дека раководните тела ја злоупотребуваат доминантната позиција.

Европскиот суд на правдата треба да донесе конечна одлука на крајот на годината, но необврзувачкото мислење дадено од генералниот правобранител во декември е дека правилата што им дозволуваат на УЕФА и ФИФА да го блокираат формирањето на нови натпреварувања се во согласност. со правото на ЕУ.

Рајхарт посебно истакна дека новата Суперлига ќе биде отворено натпреварување и дека клубовите ќе обезбедуваат место според пласманот во домашната лига. Тој додаде дека тие лиги ќе останат основа на фудбалот и дека новата Суперлига ќе донесе нови приходи за поддршка на целата пирамида.