Донарума изненаден од потегот на Милан, сакал да остане на Сан Сиро

Џанлуиџи Донарума е главна тема на Апенините, откако стана јасно дека ќе го напушти Милан како слободен агент.

Милан неколку месеци неуспешно преговараше со неговиот агент Мино Раиола за продолжување на соработката. „Росонерите“ последно му понудија нов договор со плата од 8 милиони евра, но немаше никаков одговор од Донарума.

Милан го загуби трпението и ангажираше нов голман, Мајк Мањан, кој вчера пристигна на прегледи и стави потпис на 5-годишен договор.

„Скај Италија“ пренесува дека Донарума останал шокиран од таквиот потег на клубот, бидејќи мислел дека по завршување на сеозната ќе продолжат преговорите.

Тој очекувал дека уште ќе преговара со раководството на „росонерите“, па не барал нов клуб, бидејќи сакал да остане на „Сан Сиро“.

Милан со ова испрати силен сигнал до голманот и неговиот агент Раиола, дека нема да моли никого и дека ниту еден играч не е поголем од клубот.