Две од две за Арсенал во новата сезона

Второто коло во Премиер лигата беше отворено со дуелот помеѓу Арсенал и Барнли на Емирати. Арсенал беше поуспешен и славеше со резултат 2:1.

Првата голема шанса беше видена во 12. минута пред голот на Барнли. Лаказет се обиде со глава, но голманот на Барнли беше на висина на задачата.

Сепак, не се чекаше долго за гол на Арсенал. Себаљос во 13. минута центрираше од корнер, а Лаказет одлично се снајде на мал простор и успеа да го пронајде патот до мрежата на голот на Барнли.

Арсенал беше поконкретен и после погодокот, но Барнли успешно се бранеше. Гостите еден свој опасен напат успеаа да го крунисаат со гол во финишот на првиот дел.

Се играше 43. минута кога Ешли Барнес погоди за 1:1.

Мрежата на голот на Барнли се затресе во судиското продолжение на првиот дел, но голот беше поништен поради офсајд.

Арсенал беше подобар тим и во вториот дел, напаѓаше, а до гол за 2:1 дојде во 64. минута. Себаљос ја додаде топката до Обамејанг, а Габонецот со прекрасен удар го совлада гостинскиот голман.

До крајот имаше уште неколку возбудувања, Тореира имаше одлична шанса во 90. минута, но на крајот остана 2:1. Така, Топџиите стигнаа до втората победа во новата сезона во ПЛ.