Видео: Интер го искористи киксот на Јувентус, Икарди му „дише во врат“ на Имобиле!

Екипата на Интер во рамките од 13 коло во Серија А запиша сигурна победа од 2:0 против тимот на Аталанта.

„Нероаѕурите“ против Аталната ја оправдаа улогата на фаворит. После досадното полувреме во кое видовме само по еден шут во рамките од голот и на двете страни, Интер се разбуди во вториот дел.

Поточно се разбуди Аргентинецот Мауро Икарди кој продолжува со одличната форма. На стартот од вториот дел после само шест минути игра, Икарди остана заборавен во шеснаесетникот на гостите, а тоа напаѓач од негов калибар и тоа како знаеше да го искористи.

По овој погодок набрзо следуваше и втор. Повторно Икарди во главна улога, овој пат нафрли Де Амбросио, а капитенот повторно со глава ја смести топката зад грбот на Бериша.

Со оваа победа Интер стигна до втората позиција и има два бода помалку во однос на лидерот Наполи, додека Јувентус кој денес беше поразен на гостувањето против Сампдорија сега се наоѓа на третата позиција, Рома е четврта со еден бод помалку, но и натпревар помалку.