Без победник во Мадрид, одлуката во Лондон🎥

Реал Мадрид и Челзи одиграа возбудлив натпревар кој заврши без победник, па патникот во финалето ќе се решава во Лондон.

Уште од самиот старт Челзи подобро го отвори мечот, но Куртоа со двојна одбрана спречи водство на „сините“.

Неколку минути подоцна Пулишиќ им избега на чуварите и погоди за водство на Челзи.

Меѓутоа, потоа Реал заигра подобро и стигна до израмнување со фантастичниот гол на Карим Бензема, кој долго ќе се врти на најавните шпици.

Во второто полувреме гледавме израмнет фудбал, главно на средината на теренот. Тухел во игра ги стави Хаверц и Зијех, па Челзи ја презеде играта и имаше поголем посед на топката.

Во последните петнаесетина минути двата тима не сакаа да преземат голем ризик и како да се задоволија со ремито, па патникот во финалето ќе се решава на реваншот.