Алегри: Прво се договоривме да останам во Јувентус, а потоа добив отказ

Италијанскиот стручњак Макс Алегри на крајот од оваа сезона го напушта Јувентус откако клубот одлучи да му се заблагодари за соработката.

Алегри со Старата дама освои пет титули по ред во Серија А, но главната цел ЛШ не беше исполнета, иако на два пати со својот тим играше во финалето.

После овогодинешниот неуспех во ЛШ челниците на клубот одлучија да му се заблагодарат на Алегри за соработката и после последното коло во Серија А дефинитивно ја напушта клупата на Старата дама.

Се уште не е познато кој ќе биде негов наследник, но и тој каде ќе ја продолжи кариерата. Призна дека веќе има неколку понуди и дека сигурно нема да одмара.

„Зборував со претседателот после натпреварот со Ајакс и имавме план да продолжиме, но во следните шест недели не одевме по ист пат. Не зборувавме за договор, но сфатив дека за Јувентус е најдобро нешто да се промени. Во спротивно веќе во септември или октомври ќе имаме нови проблеми и најдобро е да се замине кога ситуацијата е се уште прилично добра.“ – изјави Алегри и додаде:

„Во петокот утрото добив информации дека нема да продолжам во Јувентус. Имавме разговор во четвртокот и уште тогаш знаев дека нема да бидам тренер на Јувентус. Не ми рекоа директно, но знаев. Нема да земам никаков одмор и сакам веднаш да се вратам на клупата.“