Хумелс знае трикови со кои ќе го запре Роналдо

Фудбалерите на Баерн Минхен вечерва на домашен терен во Лигата на шампионите ќе го играат првиот натпревар од полуфиналниот двомеч против Реал Мадрид.

Навивачите на Баерн се надеваат дека нивниот тим конечно може да го запре Реал Мадрид кој во претходните две сезони стигнуваше до трофејот во најелитното еворпско натпреварување.

Во Баерн се свесни дека најголемата опасност доаѓа од Кристиано Роналдо, но дефанзивецот на германскиот тим Матс Хумелс верува дека може да го запре Португалецот.

„Навистина гледам многу натпревари во слободно време и така учам повеќе. Гледајќи го Роналдо сфатив дека има неколку трикови со кои можете да го запрете. Ваквото знаење ќе се обидам да го искористам против него, но нема да ви открија за што се работи“.

„Роналдо сигурно не е доминантен како во претходните години и јасно е дека сега повеќе се фокусираше на постигнувањето голови. Тој е најдобриот напаѓач во светот и со еден потег може да го реши натпреварот иако не троши енергија како некогаш“, изјави Хумелс.