Објавено писмото кое Суперлигата го испратила до УЕФА и ФИФА

Доцна вчера вечер 12 европски клубови објавија формирање на Суперлига, натпреварување кое ќе биде конкуренција на Лигата на шампионите на УЕФА.

Во Суперлигата ќе играат 20 клубови, а засега во јавноста се познати 12 од 15 основачи. Тоа се: Реал, Барселона,Атлетико, Милан, Интер, Јувентус, Манчестер Јунајтед, Манчестер Сити, Ливерпул, Челзи, Арсенал и Тотенхем.

Од друга страна УЕФА денес треба да ги претстави измените за Лигата на шампионите која од сезоната 2024/2025 ќе има 36 клубови. Претходно УЕФАА објави дека клубовите кои ќе настапат во Суперлигата нема да имаат право за настап во Лигата на шампионите и националните првенства, а со помош на ФИФА би можеле да им забранат на играчите да играат за репрезентациите.

Сега британски „Мирор“ објави писмо кое претставниците на Суперлигата го испратиле до ФИФА и УЕФА. Во писмото тие повикуваат на соработка.

„Загрижени сме дека ФИФА и УЕФА на ова писмо би можеле да одоговорат со казни и исклучување на фудбалерите или клубовите од своите натпреварувања. Се надеваме дека тоа нема да биде вашиот одговор и дека ќе ја препознаете потребата од вакво натпреварување. Исто така, бараме ваша поддршка и соработка за натпреварувањето полесно да се воведе. Ве повикуваме да се сретнеме и да разговараме за тоа како Суперлигата најдобро да ја прилагодиме на фудбалскиот свет“, гласело писмото.

Од Суперлигата потенцираат дека парите заработени од ова натпреварување ќе се користат и за трансфери на фудбалери од клубови кои не играат во тоа натпреварување, па сметаат дека така сите би имале корист од Суперлигата.