Клоп презадоволен: Фантастично е да се биде дел од испишувањето на историјата

Тренерот на Ливерпул, Јирген Клоп изјави дека е убаво да се учествува во пишувањето историја.

Германецот беше презадоволен откако неговата екипа го победи Марибор со 7:0 во Лигата на шампионите и оствари рекордна победа на гостински терен во европските натпреварувања.

Ливерпул вчера во Словенија го совлада Марибор со 7:0 во натпревар од третото коло во групата „Е“ од Лигата на шампионите. Двојни стрелци беа Роберто Фирмино и Мохамед Салах, а по еден гол постигнаа Фелипе Кутињо, Алекс Окслејд Чемберлејн и Трент Александар Арнолд.

Тоа беше најубедлива победа на еден англиски клуб на гостување во европските натпреварувања. До сега рекордот го држеа Лидс и Манчестер Јунајтед со победи од по 6:0. Лидс во октомври 1969 година го победи норвешки Лин, а Манчестер Јунајтед беше убедлив против Шамрок во септември 1957 година.

„После натпреварот ми кажаа за рекордот, не знаев за тоа. Големата историја понекогаш знае да биде и терет, но убаво што успеавме да испишеме дел од историјата. Ќе биде тешко некој да го собори овој рекорд. Прилично е тешко да победите со 7:0, а тој резултат е доказ дека одигравме неверојатно добро. Оваа победа на екипата ќе и донесе голема самодоверба“, изјави Клоп за британските медиуми.