Лајпциг – Тотенхем: Нагелсман уште еднаш ќе го надмудри Мурињо?

Лајпциг заврши голем дел од работата со победата на гости кај Тотенхем од 0:1. Сега останува само да го комплетираат впечатокот. Мурињо има проблеми со повредени фудбалери, а се наоѓа и во лоша серија па ќе има крајно тешка задача да го поправи впечатокот од првиот меч во Лондон.

Нагелсман сака да стигне далеку во Европа

Додека победата на Лајпциг со 0:1 на „Вајт Харт Лејн“ беше индикација дека ова е тим што направи значаен исчекор под водство на Нагелсман, последните две ремија во Бундеслигата покажаа дека имаат уште долг пат да изодат за да стигнат до Баерн Минхен.

Саботниот нерешен дуел без голови во Волфсбург беше класичен пример за тоа. Нагелсман имаше неколку смели промени во тимот, но Кристофер Нкунку беше загубен на десната позиција, додека Јусуф Поулсен беше катастрофален, а и тој настап беше прв старт во лигата во 2020 година. Лајпциг сега падна на третото место на табелата и веќе заостанува со пет бода во однос на Баерн Минхен и со бод во однос на вториот Дортмунд.

Но чудни беа изјавите на Нагелсман после саботниот меч, по кои може да се заклучи дека на него ќе му биде подраго да обезбеди пласман во следната фаза од Лигата на Шампиони, отколку да се бори до крај за шампионската титула со Баерн Минхен.

Да не се сватиме погрешнп – Лајпциг има неверојатно добра сезона. Лајпциг не загуби ниту еден натпревар против најголемите конкуренти сезонава и во Бундеслигата и во Лигата на Шампиони. Тие двапати ремизираа со Баерн, двапати со Леверкузен, ремираат 3:3 со Борусија Дортмунд и однесоа четири бода од Борусија Менхенгладбах. Лајпциг загуби само два пати дома цела сезона, една од Шалке и еднаш од Лион и тоа во низа.

На овој меч, Лајпциг ќе биде уште појак. На првиот дуел со Тотенхем не играше Упамекано поради суспенција, но тој сега се враќа во тимот за уште поцврста одбрана.

Тотенхем со слаб напад и во катастрофална серија

Кога насмеаниот, позитивен Жозе Мурињо пристигна во Тотенхем, зборувајќи сосем опуштено и мирно за потенцијалот на составот, се чинеше дека можеби ќе може да ги промени навиките што му го оцрнија времето во Челси, Реал Мадрид и Манчестер Јунајтед. Да, трофеите беа освоени, но облакот на негативност се надвисна над нив.

Некои од тие стари навики се вратија. Но и повредите на Хари Кејн и Хјунг-Мин Сон му дадоа можност на Мурињо да управува со очекувањата. Тука е и разочарувањето на сезоната Ндомбеле, кој летоска беше донесен како големо засилување но не покажа ништо од неговиот квалитет. Особено загрижувачка е играта на Спарси во последно време.

Спарси загубија четири од последните пет натпревари. По поразот од Лајпциг, загубија од Челзи и Вулвс во лигата, па загубија на пенали во Фа Купот од Норвич, за минатиот викенд да одиграат само 1:1 кај Барнли.

Деле Али играше како импровизиран напаѓач против Барнли и го постигна израмнувачкиот гол од пенал. Тој би можел повторно да го предводи нападот, со поддршка од Стивен Бердвин и Лукас Моура, но тоа секако дека би бил далеку послаб напад од она со кое што реално располага тимот на Мурињо.

Aнализира: Јовица Симонoски