Лацио може да добие засилување од Милан

Италијанските медиуми пренесуваат Лацио новото засилување може да го доведе од Милан.

Имено, екипата од престолнината на Италија во летниот преоден рок ќе се обиде да го ангажира 27-годишниот дефанзивец на Милан Алесио Ромањоли на кого договорт му истекува на крајот од сезоната.

Така тимот од „Олимпико“ би добил бесплатно засилување, а Ромањоли би го направил најплатен играч во клубот со годишна плата од околу три ипол милиони евра. Она што е интересно е што Ромањоли е „дете на Рома“, меѓутоа во минатото истакнуваше дека е навивач на Лацио.

Токму од Рома дојде во Милан во 2015 година, а во еден период играше и на позајмица во Сампдорија. Како играч на Милан стигна и до статус репрезентативец на Италија за која настапува од 2016 година. На 12 натпревари постигна два гола.

Сезонава Ромањоли запиша вкупно 21 настап и оствари учинок од еден гол и една асистенција. Освен како стопер Ромањоли по потреба може да игра и како лев бек.