Иско донесе конечна одлука – три клуба во игра за неговиот потпис!

Судејќи според пишувањето на мадридскиот весник „АС“, Иско сигурно ќе си замине од Реал Мадрид на крајот на сезоната.

Весникот тврди дека Иско донел конечна одлука и штом ќе заврши сезоната, подготвен е да ги спакува куферите и да го промени тимот.

Не е тајна дека Иско е во лоши односи со тренерот Солари, па поради тоа го загуби првотинскиот статус и оваа сезона често ја грее клупата.

Сепак, без разлика дали Солари ќе остане на кормилото на „кралевите“ и следната сезона, Иско донел одлука да го напушти „Сантиаго Бернабеу“.

Договорот на Иско со „кралскиот“ клуб истекува во 2022 година, но Реал нема да му стои на патот и е спремен да го продаде. Според шпанските медиуми „кралевите“ веќе ја одредиле цената и ќе го пуштат да замине за сума од 80 милиони евра.

„АС“ тврди дека во моментов има три европски гиганти кои се спремни да ја платат таа сума за шпанскиот плејмејкер.

Првиот е Јувентус кој веќе подолго време е заинтересиран за Иско и според тренерот Алегри токму таков креативец е тоа што му недостасува на тимот.

Интерес за Иско покажува и Пеп Гвардиола кој и во минатото се обидуваше да го донесе сонародникот во својот тим, а силна конкуренција ќе имаат и во Ливерпул кој исто така нема да жали пари за да го донесе Шпанецот на „Енфилд“.