„Еурофарм Пелистер е локален клуб, не е државен проект како Вардар“

Еурофарм Пелистер сезонава се врати во Лигата на шампионите, но македонскиот шампион во групната фаза не освои ниту бод, а утре го игра последниот натпревар против Клоштад во Норвешка.

Тренерот на „пелистерци“, Бранислав Ангеловски смета дека клубот е во тежок процес и ситуацијата на битолскиот клуб ја спореди со примерот на Металург и Вардар во минатото.

„Играњето во Лигата на шампионите донесе многу за Битола. Години наназад слушав како се зборуваше дека и да биде Еурофарм Пелистер шампион на Македонија нема каде да игра во Лигата на шампионите. Докажавме дека тоа е невистина. Организациски извлековме повеќе од максимум од оваа сала, а навистина ми е жал што на овој натпревар патуваме без освоен бод.

Но, мора да сфатиме дека Еурофарм Пелистер е локален клуб, не е државен проект како Вардар. Би сакал тоа да се случи и со нас, па и со кој било друг клуб од Македонија. Ние го имаме најмалиот буџет во Лигата на шампионите. Во Европската лига има екипи кои имаат далеку поголеми буџети од нашиот и не ја поминаа групата.

Секој почеток е тежок. Истото беше и со Металург, кој во првата сезона губеше по 15 разлика од екипи како Загреб, Чеховски Медведи и други, а потоа размислуваше за „фајнал-фор“. Слична беше ситуацијата и со Вардар“, изјави Ангеловски.