Вундеркиндот „го запали“ Минхен со несмасна изјава

Најновото „чудо од дете“ кое произлезе од минхенската фабрика е Ленарт Карл, кој оваа сезона блесна.

Постигна шест гола, од кои три во Лигата на шампионите на само четири натпревари, запиша две асистенции и се утврди во тимот на Венсан Компани. Некој кого Бајерновата публика до неделата попладне го следеше со воодушевување.

А потоа им се згади. Еден непотребен излет во медиумите го направи „персона нон грата“ во Баварија. За време на брифингот со навивачите во недела, Ленарт Карл зборуваше за своите соништа, тогаш ги насмеа присутните, но никој немаше волја за шега и сега се соочува со бројни навреди.

„Бајерн е многу, многу голем клуб. Сон е да се игра тука. Но, во одреден момент, дефинитивно би сакал да играм за Реал Мадрид. Тоа е мојот клуб на соништата. Тоа останува овде меѓу нас (смеј). Се разбира, Бајерн е нешто специјално и многу е забавно тука“, кажа Ленарт Карл.

Сега е големо прашање како ќе се однесува самиот Бајерн кон него. Наводно, во клубот знаеле дека Реал е неговата голема љубов, разговарале интерно за тоа и го предупредиле да остави такви работи зад сцената, а во случај на слична тема во медиумите внимателно да говори. Тоа не го направи.