Шевченко: Леао ќе имаше место и во мојот Милан

Легендата на Милан, Андриј Шевченко, го пофали тренерот на “росонерите”, Масимилијано Алегри, и изјави дека ѕвездата Рафаел Леао би имал место во тимот од времето на Украинецот на “Сан Сиро”. Тој исто така додаде дека на актуелниот состав му недостига типичен централен напаѓач како него, Филипо Инѕаги или Ернан Креспо.

„Ми се допаѓа ентузијазмот во Милан. Играчите ги прифатија идеите и структурата што ги донесе Макс. Никогаш не сум работел со него, но го познавам и го ценам високо. Тој има импресивна кариера, и без разлика дали ти се допаѓа неговиот стил или не, Алегри успеа да го убеди целиот тим на своја страна, со што дојдоа и резултатите. Составот одговара на неговиот стил на игра. Има силни и искусни фудбалери како Лука Модриќ, Адриен Рабио, Леао и Кристијан Пулишиќ. Прерано е да се каже дека тимот е фаворит за Скудетото, но Милан е во борба и се наоѓа во добра форма. Недостатокот на европски натпревари дава предност во поглед на подготовката и енергијата.

Да, Леао ќе играл во мојот Милан. Не знам дали ќе беше стартер, но ќе имаше место во тимот, бидејќи тој е напаѓач со уникатни квалитети. Леао не е типичен централен напаѓач, туку е флангов играч. Ако се потпреш на длабока одбрана и ги користиш неговите најдобри вештини, и му даваш слобода да трча, Рафа има квалитети да се справи добро, бидејќи, кога има слободни простори, тој ги совладува сите со својата брзина. Различно е кога нема простори. Макс сега се обидува да го искористи како напаѓач и ќе видиме. Засега резултатите се позитивни, Леао постигнува голови и запознава нова улога. Не секогаш ќе биде лесно, бидејќи како напаѓач треба да знаеш да постигнеш гол во секоја ситуација. Модриќ? Тој не е потребно да се споредува. Тоа е еден врвен играч кој дојде во Милан со голема желба. Уште има многу што да придонесе и е убаво да се види како еден шампион како него се труди на овој начин.