Откриено колку ќе заработува Нејмар во Сантос – ќе се изненадите!

Нејмар официјално се врати во Сантос, клубот во кој ја започна својата професионална кариера, а сега е познато и колку ќе заработува.

По спогодбениот раскин на договорот со саудискиот Ал Хилал, каде заработуваше астрономски 155 милиони евра годишно, триесетидвегодишниот фудбалер потпиша шестмесечен договор со Сантос. 

Според информациите кои ги пренесува “De Primeira” преку “UOL Esporte”, Нејмар во Сантос ќе добива основна плата од 161.500 евра месечно.

Она што го прави овој договор посебен е што поранешната ѕвезда на Барселона и Пари Сен Жермен ќе задржи 90% од правата на својата лик, што му овозможува значително поголеми приходи над основната плата.

Овој модел на договор потсетува на неговиот претходен престој во Сантос од 2010 до 2013 година, кога заработуваше основни 48.400 евра месечно, но благодарение на маркетиншките права вкупната заработка му изнесуваше околу 533.000 евра месечно.

Престојот на Нејмар во Ал Хилал беше обележан со низа повреди, кои го ограничиле на само седум настапи и еден постигнат гол во текот на 17 месеци.

Најпрво доживеа сериозна повреда на коленото, а потоа и повреда на задната ложа, што значително го намали неговото присуство на теренот.

Очекувајќи поголем придонес во Саудиската Про лига, Ал Хилал и бразилскиот фудбалер одлучија да ја прекинат соработката, што ги отвори вратите за неговото враќање во Сантос.

“Време е (да се вратиш), Нејмар. Време е да се вратиш кај својот народ. Во нашиот дом, во клубот кој е во нашите срца. Добредојде, наше момче“, рече претседателот на Сантос Марсело Тешеира. 

Сантос е еден од најуспешните клубови во Бразил, со осум национални титули, 22 регионални шампионати на Сао Пауло и три титули во Копа Либертадорес.

Со години, дресот на овој славен клуб го носеле легендарни фудбалери како Пеле, Карлос Алберто, Коутинјо, Зита и многу други.