Тензии во Тотенхем: Фудбалерите ќе се степаа со навивачите по поразот од Борнмут (Видео)

Состојбата во Тотенхем Хотспур станува сѐ потензична поради новите разочарувачки резултати во Премиер лигата. Поразот од Борнмут со резултат 3:2, кој беше запечатен со голот на Антоан Семењо во 95-тата минута, дополнително ја влоши веќе кревката атмосфера во клубот.

Тимот на Спарс успеа да слави само еднаш во последните шест натпревари во лигата, а разочарувањето меѓу навивачите станува сѐ поочигледно.

По завршувањето на натпреварот на стадионот „Виталити“, дојде до вербална конфронтација меѓу неколкумина играчи на Тотенхем и присутните навивачи. Според снимките кои брзо се проширија на социјалните мрежи, Мики ван де Вен им се доближил на трибините и влегол во жешка расправија со еден од нив.

Клупскиот персонал се обиде да ја смири ситуацијата, но во конфликтот се вклучи и Педро Поро, кој, според сведоштвата, бил видливо бесен и морал да биде задржан од редарите. Жоао Палиња, стрелец на атрактивниот гол за 2:2, се обиде да ја преземе улогата на помирувач и да спречи понатамошна ескалација.