Милитантите го пребиле Петковиќ во сред Загреб: Динамо се огласи и остро ги демантираше наводите

Во одредени хрватски медиуми утрината се појави информација дека најдобриот напаѓач на загрепски Динамо и репрезентативец на Хрватска, Бруно Петковиќ, бил претепан, но веднаш се огласи и самиот клуб со демант на овие наводи.

Загрепски Динамо утрово остро ги осуди медиумските натписи и демантираше дека се случил било каков физички напад врз Бруно Петковиќ, а особено дека не станува збор за никакво изнудување.

Претходно, хрватскиот весник Национал навел дека Бруно Петковиќ бил претепан, и дека веста била потврдена од повеќе извори блиски до полицијата. Наведуваат дека поради тоа не присуствувал на концерт два дена пред клучниот натпревар против Милан во Лигата на шампионите.

Текстот од соопштението на загрепскиот клуб го пренесуваме целосно:

“GNK Динамо остро демантира невистинитите наводи објавени во медиумите, кои се однесуваат на нашиот играч Бруно Петковиќ. Најостро ги отфрламе и осудуваме инсинуациите за било каков инцидент, а особено за наводен физички напад или случај на изнудување на нашиот играч. Станува збор за апсолутна дезинформација која нема никаква врска со реалноста. Бруно Петковиќ е комплетно безбеден и целосно посветен на своите обврски во клубот и моментално се наоѓа во Болоња на дополнителни прегледи кај врвни стручњаци,” нагласува Динамо.

Од Максимир додадоа дека ваквите натписи штетат и на играчот и на клубот, и повикаа на одговорно известување на медиумите.

“Ваквите сензационалистички и неточни натписи носат штета не само на нашиот играч, туку и на GNK Динамо како клуб, како и на спортот во целина. Ги повикуваме медиумите на одговорно и професионално известување базирано на проверени факти, а не на непроверени информации кои шират невистини. GNK Динамо и Бруно Петковиќ ќе ги преземат сите потребни правни чекори за заштита на угледот на клубот и нашиот играч,” се заклучува во соопштението за јавност.

Петковиќ, потсетуваме, веќе долго време е повреден и нема можност да му помогне на својот тим во борбата за нокаут фазата на Лигата на шампионите. За жал, неговиот Динамо остана без пласман во нокаут фазата поради послабата гол-разлика.