Maкедонија – Чиле: Најава и анализа, да одиграме подобро и да победиме!

Македонија го игра клучниот меч на Светското ракометно првенство против Чиле. Победникот ќе патува во втората фаза од Мундијалот, нешто во кое што бевме сигурни. Но после првите две кола и катастрофалните изданија на Македонија, сега стравуваме дури и од селекцијата на Чиле.

Да се подобри играта во сите сегменти

Да се играше овој меч во првото коло, ќе типував на убедлива победа на Македонија, но сега ситуацијата воопшто не е лесна од обложувачки аспект.

Македонија одигра два очајни натпревари против Шведска и Египет, натпревари под секој просек на македонската репрезентација и дефинитивно едни од најлошите на големите натпреварувања. 19 разлика пораз од Египет е премногу и за тој меч нема потреба да се пишува ништо, доволно е само еден збор – катастрофа.

Сличен беше и првиот пораз од Шведска, во меч во кој речиси и да не направивме фаул. Се игра без елан, без мотив, без желба, а кога тоа е така поразите се неизбежни. Токму затоа, сега дел од македонската спортска јавност стравува дури и од пораз од Чиле, кој вообичаено е топовска храна за било која европска селекција.

Дојде време да се стравува од Чиле

Техничките грешки во нападот и очајната игра во дефанзива за Македонија се најголем проблем. Во нападот се губеа топки, без да се стигне до шут кон противничкиот гол, со многу технички грешки. Никако не може да се дојде до ситуација за шут, бидејќи ракометарите изгледаат анемични без никаква идеа. Брестовац, како воопшто да ги нема анализирано противниците. Истите технички грешки мора да се намалат и конечно да се реализираат нападите ако сакаме победа над Чиле. Дефанзивата не беше добра, со премногу дупки и со катастрофална игра еден на еден или два на два. Навистина е чудно, но ете дојде и такво време, да се стравува од Чиле. Но на овој меч, з аразлика од предходните два се очекува Стоилов и Лазаров да добијат полна минутажа и јасно е дека како по обичај тие ќе го преземат овој пат товарот на свои плеќи и ќе се обидат да ги натераат младите да ги следат на теренот.

Тренинг база на Чиле пред СП, беше Македонија

Чиле се подготвуваше во Скопје за настапот на Светското Првенство. Македонија им служеше како тренинг база, а нашата репрезентација како добра подготовка. Но по откажувањето на Чешка, ние влетавме во истата група со оваа селекција. Тоа е можеби проблем за нив, со оглед на тоа што сега ние ги знаеме сите нивни варијанти. На два пати славеше Македонија, со четири и два гола разлика и тоа без Лазаров и Стоилов во репрезентацијата. Сега со нивна помош, се наговестува дека во голема предност е Македонија. Но Чиле најавува дека сака да го искористи очајното издание на Македонија и реално има право да се надева на такво нешто. Освен тоа, Чиле одигра и меч со прволигашот Работнички и повторно не победи, одигра реми, што само дополнително може да не мотивира нас.

Чиле зависи од Феуштман и Салинас

Целата игра на Чиле се сведува на двајца ракометари. Играат со сличен стил како и Македонија – можеби затоа се подготвуваа тука. Играат доста на пикер, или зависат од шутевите на еден ракометар. Ервин Феуштман е најдобриот во Чиле. Се работи за одличен бек шутер кој е голем потрошувач на топки, но и одличен реализатор. На првиот меч со Египет, даде седум гола од 10 удари, а имаше и неколку одлични асистенции до пикерот. И на вториот меч имаше ист учинок. А пикерот на кој треба да се внимава е Естебан Салинас кој е голем борец. На првиот меч даде осум гола од 10 шута, а против Шведска имаше четири гола од седум обиди.

Ако се сопрат овие двајца, тогаш шансите дека Македонија ќе слави победа се огромни.