Кирјос повтори: Ѓоковиќ е најдобар тенисер во историјата!

Според талентот, Ник Кирјос веројатно можеше да се споредува со најголемите асови во историјата. Австралиецот ги победуваше сите членови на големата тројка, но никогаш не се посвети доволно на тенисот за да може во долг период да биде конкурентен за нешто сериозно во тенисот.

Последните години и самиот стана свесен за тоа, па иако тоа воопшто не го убеди да се посвети повеќе на работата, барем стана објективен и за него повеќе нема дилеми кој е најдобар во „белиот спорт“.

На барање на порталот „Get Set Тенис“ се согласи да ги опише најдобрите тенисери во овој спорт со само еден збор, а за Ѓоковиќ го имаше најдобриот.

„GOAT!“, изјави Австралиецот скратеница која на англиски значи „најголем на сите времиња”.