Капело во Рома? Се огласи легендарниот тренер!

Легендарниот италијански тренер Фабио Капело ги отфрли шпекулациите дека летово ќе ја преземе Рома, кажувајќи дека е престар за работа.

“Не, на моите години не можам повеќе да бидам тренер. Не сакам да кажуваат дека сум малку сенилен, дека не ме сакаат таму”, рече 78-годишниот Капело за италијанските медиуми.

Се шпекулираше дека Капело би можел да го замени Клаудио Раниери на клупата на Рома летово.

“Се надевам дека, кого и да изберат, тоа ќе биде одлука за која внимателно се размислило. Раниери многу добро се носи со ситуацијата и верувам дека сакаат да се фокусираат на некој што знае како да ја разбере многу специфичната атмосфера во Рома”, рече Капело.

Тој се осврна и на Јувентус, за кој своевремено играше, а беше и негов тренер од 2004 до 2006 година, по повод отказот на тренерот Тијаго Мота по само осум месеци.

“За жал, кога сте тренер на Јувентус, минималната цел е пласман во Лигата на шампионите, но голема разлика прави и стилот на фудбал. Мислам дека Мота не го сфати целосно каде се наоѓа и затоа имаше големи потешкотии. Тој сакаше да направи нешто поинакво, но за толку голема промена е потребно време. Кога имате тригодишен договор, мислите дека ќе завршите барем една цела сезона”, наведе Капело.

Капело неодамна го критикуваше тренерот на Манчестер Сити Пеп Гвардиола, кажувајќи дека бил арогантен и дека го уништувал фудбалот, обидувајќи се самиот да победува, наместо да се концентрира на карактеристиките на играчите.

Гвардиола гневно реагирал на тоа и кажал дека не е доволно квалитетен да го уништи италијанскиот фудбал.

“Очигледно тоа значи дека моите коментари биле на место”, одговори Капело.