Инсајдер откри каде Роналдо ја продолжува кариерата: Веќе има потпишано договор

Статусот на Кристијано Роналдо и неговата иднина се една од водечките теми на претстојниот трансфер период. Според Санти Ауна, француски новинар од Фут Меркато, познато е каде напаѓачот ќе ја продолжи кариерата. Според неговите извори, се случила промена и Роналдо сепак потпишал нов договор со саудискиот Ал Наср.

Со тоа, барем привремено, се стави крај на шпекулациите дека Роналдо заминува од клубот. Се спомнуваа неколку опции – од големи европски клубови за кои би играл веќе на претстојното Светско клупско првенство до пензија. Договорот на Роналдо со Ал Наср истекува на 30 јуни, по што можеше без обештетување да премине во било кој клуб.

Доминација во Саудиска Арабија

Португалскиот ас, кој пристигна во Ал Наср на 1 јануари 2023 година со најголемиот договор во историјата на спортот вреден 200 милиони евра годишно, одигра вкупно 111 натпревари за клубот и постигна импресивни 99 голови во сите натпреварувања.

Првата сезона на Роналдо во Саудиска Арабија беше адаптација на новата лига и култура, но веќе тогаш ја покажа својата класа. Во сезоната 2022/23 постигна 14 голови во 16 лигашки настапи, вклучувајќи хет-трикови против Ал Вехда и Дамак.

Особено импресивен беше неговиот настап против Ал Вехда во февруари 2023 година, кога постигна четири голови во победата од 4:0, при што првиот гол беше неговиот 500-ти во лигашки натпреварувања. И покрај индивидуалните успеси, Ал Наср заврши како второпласиран во лигата.