Една од најголемите ѕвезди си заминува од Реал: „Доста му е од потценување“

Како што пишува шпанската Марка, бразилскиот напаѓач Родриго (24) сериозно размислува за заминување од Кралскиот клуб зошто смета дека не е доволно ценет.

Родриго пристигна во Мадрид во 2019 година и иако од тогаш одигра 267 натпревари, постигна 68 гола и оствари 50 асистенции, речиси целото време беше во сенка на сонародникот Винисиус Жуниор. И покрај клучните моменти во Лигата на шампионите и одлучувачките голови од клупата, никогаш немаше статус на вистинска прва ѕвезда.

Неговото незадоволство се зголеми последните месеци, а капката што ја прелила чашата беше кога повторно беше во втор план во контекст на доаѓањето на Килиан Мбапе и сè поголемото медиумско внимание насочено кон Џуд Белингем, Вини и новите засилувања.

„Родриго смета дека во Реал Мадрид не го ценат колку што заслужува. Го нервира што постојано е во втор план, додека сите погледи се насочени кон другите. Поради тоа е подготвен да си замине“, наведува Марка.

За Бразилецот нема да недостигаат понуди – интерес покажуваат бројни европски великани, а се споменува и профитабилна опција од Саудиска Арабија. Но, англиската Премиер лига изгледа како најверојатна дестинација. Марка наведува дека Ливерпул е прв фаворит за неговото доведување, додека Манчестер Јунајтед исто така се вклучи во трката барајќи нови решенија за офанзивниот дел на тимот.