Драма во Еквадор: Полицијата во престрелка со оружјe ослободи киднапиран фудбалер

Еквадорскиот фудбалер Педро Перлаза (33), кој заедно со пријател беше киднапиран минатиот викенд, е ослободен во акција на еквадорската полиција. Одбранбениот играч на Делфин беше киднапиран откако присуствуваше на забава во северозападниот крајбрежен град Есмералдас. Полицијата успеа да ја лоцира куќата каде што жртвите беа затворени и да ги ослободи.

“По собирање информации од страна на Единицата за борба против киднапирање и изнуда (UNASE), успеавме да ја лоцираме куќата во руралниот дел каде што жртвите беа затворени”, објави полицијата. “По судир во кој се случи и размена на оган, ослободивме две жртви на киднапирање и обид за изнуда”, се додава во соопштението.

Перлаза има три настапи за репрезентацијата на Еквадор, а во текот на кариерата играше за еквадорските клубови Рокафуерте, ЦД Америка, КС Патрија, Петролеро, Куеведо, Макара, Портовијехо, Колон, ЛДУ Кито, Индепендиенте, Аукас и Барселона СК.

Во Еквадор последните години е забележано зголемување на насилните злосторства. Само минатата година се регистрирани повеќе од 7000 насилни смртни случаи, што е зголемување од речиси 65% во споредба со 2022 година, според извештаите на Националната полиција.