Чудесниот голман руши светски рекорд и влегува во историјата на фудбалот.

Херојот на победата над Интер, голманот на Флуминенсе Фабио, наскоро би можел да стане светски рекордер со најмногу одиграни натпревари во историјата на фудбалот.

Рекордот сè уште го држи легендарниот англиски голман Питер Шилтон, кој чувајќи ја мрежата на репрезентацијата на Англија, Нотингам Форест, Лестер и други клубови, од 1966 до 1997 година собра точно 1387 официјални натпревари.

Сепак, сега сериозно го загрозува Фабио, 44-годишниот голман на Флуминенсе, еден од хероите на неочекуваната победа на овој бразилски клуб против Интер од Милано во осмина-финалето на Клупското светско првенство.

Фабио е убедливо најстариот учесник на натпреварувањето во Соединетите Држави, а натпреварот против Неразурите му беше вкупно 1376-ти во кариерата.

Значи, му недостасуваат само уште 12 натпревари за да го сруши рекордот на Питер Шилтон и да влезе во историјата на светскиот фудбал.

Годините го стигнуваат, одамна е влегол во петтата деценија од животот, но како што бранеше во понеделникот против Интер, изгледа дека нема наскоро да замине во фудбалска пензија.

Фабио всушност е легенда на Крузеро, чиишто голови ги чуваше на близу илјада натпревари (955). Во текот на кариерата уште бранеше за Униао Бандеиранте, Атлетико Паранас, Васко да Гама и моментално за Флуминенсе.