Арсенал броеше до пет против Лидс

Арсенал му покажа на Лидс колку тежок ќе биде животот во Премиер Лига. Тимот на Микел Артета победи со 5:0 на „Емирејтс“.

Јуриен Тимбер постигна два гола, при што и двата паднаа по корнери. Тој го отвори резултатот во 34-та минута и го постигна четвртиот гол во 56-та минута.

Букајо Сака се запиша во последните моменти на првото полувреме, а Виктор Ѓокереш ја забележа првата своја голгетерска реализација за „топџиите“ малку по паузата. Шведскиот напаѓач погоди уште еднаш од пенал во додаденото време на второто полувреме.

Мечот веќе беше решен и Микел Артета направи тројна замена и на теренот влезе 15-годишниот Макс Дауман. Под големите овации на публиката, младиот талент дебитираше за „топџиите“. Тој стана само третиот играч во историјата на Премиер лигата, кој дебитирал пред да наполни 16 години.