Хаос се случувал на теренот во Синѓелиќ, фудбалерите на Охрид добивале закани, а им било кажано: Играјте и ќутете!

Фудбалскиот клуб Охрид преку официјално соопштение остро реагираше на условите и случувањата за време на саботниот дуел против Шкендија Арачиново, натпревар што заврши со победа од 2-1 за домашниот тим. Од охридскиот клуб велат дека не бараат алиби за поразот, но јавно укажаа на серија нерегуларности, закани и недолично однесување.

„Гостопримството на домаќинот траеше само до нашето водство во 5. минута, а потоа започна вистинско дивеење – од делови на управата, од обезбедувањето, од дел од публиката, па дури и од цивили чие присуство на теренот остана необјаснето“, се наведува во соопштението.

Според Охрид, особено алармантен бил моментот по исклучувањето на Гоце Толески, кој бил вербално нападнат и насилно изведен надвор од стадионот, без можност да се врати во соблекувалната. Од клубот нагласуваат дека само неговата смиреност спречила поголем инцидент.

Критики беа упатени и кон делегатот на натпреварот, кој – како што велат од клубот – не реагирал на низа предупредувања, вклучително и на моментот кога капитенот на Охрид добил порака „Играјте и ќутете“, откако се пожалил дека на теренот нема топки.

Дополнително, охриѓани забележаа и користење пиротехника и фрлање предмети од трибините, што е строго забрането според правилата на ФФМ, но не било санкционирано.

„Организацијата беше под секое ниво и повеќе наликуваше на аматерски натпревар, отколку на меч од официјално првенство. Македонскиот фудбал треба да оди напред, а не назад неколку децении“, стои во реакцијата.

Клубот завршува со апел до институциите и Фудбалската федерација на Македонија да ги испитаат инцидентите и да не дозволат вакви појави да се повторуваат.

Дуелот меѓу Шкендија Арачиново и Охрид се одигра на теренот на Фортуна во Синѓелиќ.