Сè што треба да знаете за финалето во Лигата на шампионите

На 31 мај во Минхен, со почеток во 21 часот, ќе се одигра јубилејното 70. финале за клубски шампион на Европа. За големиот сребрен трофеј ќе се натпреваруваат фудбалерите на Интер и Пари Сен Жермен.

Интер прв обезбеди место во Минхен откако во вторникот на историскиот реванш од полуфиналето успеа да ја елиминира според многумина првиот фаворит екипата на Барселона.

Двете натпревари по 90 минути завршија со идентичен спектакуларен резултат 3:3, а потоа Неразурите во продолженијата постигнаа уште еден гол и победија со вкупен резултат 7:6, што е рекорден број голови (13) во нокаут фазата на Лигата на шампионите, заедно со полуфиналето Ливерпул – Рома (7:6) од 2018 година и дуелот Бајерн – Спортинг (12:1) во осмина финалето на 2009 година.

Следниот ден, во среда, место во финалето обезбеди и Пари Сен Жермен, откако уште еднаш беше подобар од Арсенал. По 1:0 на Емирејтс во Лондон, тие победија и на парискиот Парк на принцовите со 2:1.

Значи, Интер и Пари Сен Жермен ќе играат во јубилејното 70. финале за клубскиот шампион на континентот. Најелитното европско клубско натпреварување порано се играло под името Куп на шампионите (првпат одржано во 1955 година), а од сезоната 1992/93 го носи името – Лига на шампиони.

Натпреварот ќе се игра во Минхен, а официјално улогата на домаќин ќе ја има парискиот Светци. Финалето е на програмата на 31 мај на Алијанц арената, стадионот на Бајерн.

Оваа сезона и финалето на Лигата на шампионите влегуваат во историјата на натпреварувањето како прва сезона одиграна во новиот формат, познат како швајцарски систем. Наместо досегашната групна фаза, прво се играше лигашки дел со осум кола со вкупна табела, па потоа продолжи нокаут фазата до финалето.

Пари Сен Жермен стигна до своето второ финале на Купот на шампионите/Лигата на шампионите, а прво од 2020 година, кога загуби од сопственикот на стадионот на ова финале, Бајерн. Ова е петто европско финале за париските Светци, бидејќи претходно играа и во два последователни финалиња на Купот на победниците на куповите – го освоија во 1996 против Рапид од Виена (1:0) и загубија 1997 година од Барселона (0:1). Играа и во финалето на Суперкупот на Европа 1996 година и загубија од Јувентус со вкупен резултат 2:9.

Ова ќе биде дванаесетто европско финале за Интер од Милано и седмо во Купот на шампионите/Лигата на шампионите. Три пати црно-сините биле шампиони на Европа – 1964 година во финалето победиле Реал Мадрид (3:1), 1965 година лисабонска Бенфика (1:0) и 2010 година Бајерн од Минхен (2:0). Истото толку финалиња ги загубиле – 1967 година против Селтик од Глазгов (1:2), 1972 година од Ајакс од Амстердам (0:2) и последен пат 2023 година од Манчестер Сити (0:1).

Интер е последниот италијански клуб што ја освои Лигата на шампионите, споменатото 2010 година против Бајерн. Од тогаш до денес само Јувентус успеа да стигне до финалето, но загуби 2015 година од Барселона (1:3) и 2017 година од Реал Мадрид (1:4).

Алијанц арената во Минхен ќе биде домаќин на финалето на Лигата на шампионите по втор пат во историјата. Првото беше одржано 2012 година кога Челси го победи Бајерн по изведувањето на пенали 1:1 – 4:3.

Вкупно гледано, тоа ќе биде петто финале на Купот на шампионите/Лигата на шампионите во Минхен, со оглед на тоа што финалињата во 1979, 1993 и 1997 година се одржаа на познатиот Олимпијаштадион.

Интересно е што во секое од претходните четири финалиња одиграни во Минхен, победникот за прв пат во историјата стана шампион на Европа: Нотингем Форест 1979 година, Олимпик Марсеј 1993 година, Борусија Дортмунд 1997 година и Челси 2012 година. Оваа можност сега ќе ја има ПСЖ.

Исто така, тоа ќе биде деветто финале во Германија, откако два пати се одржа во Штутгарт 1959 и 1988 година и по еднаш во Гелзенкирхен 2004 година и Берлин 2015 година. На овој начин изедначен е рекордот од девет финалиња за европскиот шампион одржани во Италија и Англија.

УЕФА од оваа сезона го промени форматот на натпреварувањето и го зголеми наградниот фонд на 2,5 милијарди евра.

Учесниците во првата фаза на Лигата на шампионите заработија по 19 милиони евра само за пласман во „лигашкиот“ дел од натпреварувањето. Секоја победа им донесе 2,1 милиони евра, а освоен бод 700.000 евра.

Фото: UEFA/X