Пеп не е задоволен од топката со која се игра ФА-купот

Тренерот на Манчестер Сити, Пеп Гвардиола, го критикуваше квалитетот на топките со кои тимовите играат во англиските куп натпреварувања.

Сити во саботата навечер се пласираше во четвртфиналето на ФА Купот, откако го победи второлигашот Плимут со 3:1, а имаше 20 шута надвор од рамките на голот. Неодамна и тренерот на Арсенал, Микел Артета, изрази незадоволство од квалитетот на топките, откако неговата екипа загуби во полуфиналето на Лига Купот од Њукасл.

Гвардиола рече дека не е задоволен од топките на марката Митре, со кои се играат натпреварите во ФА Купот.

„Топката во Лигата на шампионите е исклучителна, топката во Премиер лигата е неверојатна, но оваа не е. Тешко е да се контролира. Кога ќе изгубите, може да звучи како да се жалите, но топката не е добра. Ова се случува со години во ФА Купот и Лига Купот, знам дека тоа е бизнис и дека има договори. Знаете ли колку удари беа над голот? Погледнете ги другите натпревари. Обично топката влегува во голот по тие удари“, рече Гвардиола.