Бројките велат: Време е за враќање на Иско и тоа на – Европското првенство!

Луис де ла Фуенте наскоро ќе го објави списокот на Шпанија со 26 фудбалери за Европското првенство ова лето, а многумина се надеваат дека на тој список ќе се најде и Иско.

Поранешниот играч од средниот ред на Реал Мадрид и еден од најзаслужните за освојување на европското првенство со тој тим, сега е член на Бетис и повторно игра во врвна форма.

На шпанската репрезентација дефинитивно и е потребен креативен играч како него, а за него оваа сезона зборуваат бројките.

По неделната победа над Алмерија стигна до бројката од осум гола, што е најмногу од сите опции што ги има Де ла Фуенте во шпанската репрезентација на средината од теренот, има најмногу удари кон противничкиот гол, најуспешни дриблинзи, а само Зубименди има повеќе комплетирани додавања.

Она што е многу важно, Иско е одличен и во дефанзива, има 18 пресечени топки, исто така најмногу од сите шпански играчи за врска. Дополнително, само Мерино добил повеќе дуели.

На сето тоа треба да се додаде и неверојатниот податок дека Иско беше прогласен за играч на натпреварот во 19 од 28 лигашки натпревари кои ги одигра оваа сезона.

Сите овие бројки говорат многу во негова корист, а зголемувањето на играчите од 23 на 26 може да му дозволи на селекторот на Шпанија да го повика Иско. 32-годишникот последниот натпревар за репрезентацијата го одигра пред пет години.