„Црвено-црна“ рапсодија – падна германскиот шампион во Скопје

Европскиот шампион Вардар продолжува со одличните партии во Лигата на шампиони, па вечерва во Скопје падна и германскиот шампион Рајн Некар (30:26).

Вардар комплетно го надигра најголемиот ривал во Групата А и сега е во пол-позиција за првото место кое води директно во четвртфиналето на Лига на шампиони.

Импресивна беше одбраната, која функционираше перфектно и против седумте играчи во напад на германскиот првак, а во нападот „црвено-црните“ беа беспрекорни па не се забележа отсуството на Лука Циндриќ.

Вардар тргна силно уште од самиот старт, во еден момент имаше и најубедливи седум гола предност (15-8), а на полувреме се замина со резултат 17-13.

Во второто полувреме Вардар не дозволи противникот да направи изненадување, ја одржуваше предноста за на крајот да слави со 30-26.

Најдобар стрелец за Вардар беше Вуко Борозан со седум голови, Чупиќ постигна шест.