Седлоски: Верувам дека овој проект ќе донесе трофеи и радост за Работнички

Трофејниот македонски стратег и легендарен македонски репрезентативец Гоце Седлоски oд вчера е нов шеф на стручниот штаб на ФК Работнички.

Тој потпиша договор на 18 месеци и ќе има мисија да го врати нашиот клуб на шампионските патеки.

„Чест ми е што доаѓам во ФК Работнички, клуб со голема традиција и реноме во македонскиот фудбал, поранешен шампион и освојувач на Купот. Би сакал да се заблагодарам на новото раководство на клубот за укажаната доверба, ја сфаќам како сериозна обврска и ќе се вложам максимално за да ги оствариме целите што заедно ги зацртавме. Веруваме дека овој проект на крајот ќе донесе многу радости и трофеи во ФК Работнички.

Мојот начин на работа кој носеше титули ќе се потрудам да го наметнам и овде. Ред, работа, дисциплина и верба во сопствените квалитети се принципите што секогаш и секаде ги носам со себе и верувам дека ќе ги воспоставиме и во тимот на Работнички. Има голем потенцијал во овој тим, а верувам дека со уште неколку засилувања ќе изградиме колектив со кој ќе се гордееме“, вели Седлоски.

Репрезентативната пауза Работнички ќе ја искористи за пријателски натпревар против Башкими в недела и тој воедно ќе биде прв на клупата за Седлоски.