Рамос: Барса на +7? Тоа и не е така голема предност

Капитенот на Реал Мадрид не може да сфати како неговиот тим не успеал да постигне погодок во натпреварот против Реал Бетис во петото коло од шпанската Примера, но и верува дека предноста на Барселона не е недостижна.

Актуелниот шампион на Шпанија и Европа го загуби натпреварот против Бетис во финишот кога Санабрија погоди во 94 минута од средбата, па „кралевите“ останаа на -7 во однос на Барселона.

„Тоа и не е толку голема предност, сезоната е на самиот почеток. Не знам зошто не успеавме да постигнеме погодок во овој натпревар, имавме навистина многу шанси. Ова не беше еден од нашите најдобри денови, но одиме дома со чиста совест. Резултатот е разочарувачки, но ова не е крај“, зборуваше Рамос кој потоа беше запрашан за судењето во овој натпревар.

„Колку повеќе зборуваме за судиите толку е полошо. Мораме да ја почитуваме нивната работа и да се обидуваме да ја избегнуваме оваа тема. Доколку постигневме три гола сега немаше да има потреба да зборуваме за судењето. Сезоната не ја започнавме како што очекувавме, но мораме да продолжиме понатаму, ние сме тим со големи играчи“, заврши капитенот на „кралевите“.