Премиер лигата направи профил на кој ќе ги објаснува ВАР одлуките во живо

Премиер лигата денеска отвори нов профил на социјалнaта мрежа, „Х“ на кој ќе ги објаснува ВАР одлуките во сезоната која започнува за два дена.

Сето ова е како реакција на критиките за одредени ВАР одлуки во минатата сезона. Според најавата на профилот ќе се обезбедува објаснување скоро во живо додека во тек се натпреварите.

„Ќе се објавуваат „фактички објаснувања за судиските одлуки на теренот и учеството на видео судијата, вклучувајќи ја и улогата на технологијата во процесот на одлучување“, се додава во соопштението.

Од Премиер лигата објаснија дека идејата ја реализирале на овој начин бидејќи ФИФА не дозволува аудио снимките од разговорите на судиите да одат во живо во ТВ преносите.

Објавите на профилот ќе бидат направени директно од Центарот за натпревари во Премиер лигата, лоциран на „Стокли Парк“ во Лондон. Станува збор за оперативен центар на Премиер лигата. Поврзан со сите 20 стадиони, ВАР центарот и радиодифузерите кои емитуваат натпревари ширум светот.

Новата сезона во Премиер лигата започнува во петок, со дуелот помеѓу Фулам и Манчестер Јунајтед.