Незапирливиот Дончиќ го предводеше Далас до победа, славеа и Детроит и Атланта

Кошаркарите на Далас Маверикс ја постигнаа четвртата победа во новата сезона во НБА. Ноќта од недела кон понеделник тие пред своите гледачи го совладаа Орландо Меџик со 108:85.

Клучни за победата на Далас се покажаа минутите од крајот на првата четвртина до крајот на втората, кога домашните од 17:20 стигнаа до 60:31, а Дончиќ беше фантастичен.

Словенецот во првото полувреме постигна 25 поени, а до крајот на натпреварот за нешто повеќе од 31 одиграна минута имаше 32 поени, девет скока и седум асистенции.

Даниел Гафорд додаде 18 поени со осум скока, а Кајри Ирвинг постигна 17 поени. Орландо настапи без својот најдобар играч Паоло Банчер, а најдобар играч беше Франц Вагнер со 13 поени, шест скока и шест асистенции.

Детроит Пистонс ја забележаа втората победа сезонава откако го совладаа Бруклин Нетс со 106:92. Секој играч од првата петорка на Детроит постигна двоцифрен број поени, додека Малик Бисли додаде 18 од клупата за резерви.

Најдобар играч на Бруклин кој и натаму е без Бојан Богдановиќ беше Камерон Џонсон со 26 поени.

Победа славеше и Атланта. Одигра одлично второ полувреме, направи +17 во однос на противникот, и на крајот го победи Њу Орлеанс со 126:111. Одлична партија кај Атланта имаше Џејлен Џонсон, кој постигна 29 поени и имаше осум асистенции и девет скока.