Милан тргнува по новата аргентинска ѕвезда

Приоритет на Милан ова лето ќе биде засилување во нападот, бидејќи Златан Ибрахимовиќ најверојатно ќе го напушти клубот на крајот на сезоната.

Потрагата по наследник на Ибрахимовиќ веќе започна, а последно име на списокот на „росонерите“ е аргентинскиот тачент од Сан Лоренцо, Адолфо Гаич.

21-годишниот голгетер веќе го привлече вниманието на многу европски гиганти. Во Аргентина е познат под надимакот „Тенк“ бидејќи е робусен, висок 190 сантиметри, но има одлична техника и исклучително чувство за гол.

Гаич оваа сезона, до паузата поради коронавирусот, запиша 12 настапи за Сан Лоренцо на кои постигна 5 гола, а минатата година дебитираше и за аргентинската репрезентација.

Аргентинецот во договорот има откупна клаузула од 13 милиони евра, сума која нема да претставува проблем за Милан.

„Росонерите“ веќе стапиле во контакт со неговиот агент и се спремни да ја платат клаузулата, но треба да ја победат конкуренцијата, бидејќи за Гаич има интерес и од други европски клубови.