Милан на Сан Паоло ја продолжи серијата натпревари без пораз

Наполи и Милан ремизираа (2:2) во натпревар од 32 коло во италијанската Серија А.

Во еден квалитетен натпревар на крајот беа постигнати 4 погодоци, а двата тим освоија по еден бод.

Милан прв дојде до водство во овој натпревар. Тео Ернандез во 20. минута стрелаше за водство на Росонерите со 0:1.

Сепак, не траеше долго радоста на гостите од Милано. Наполи во 34. минута изедначи, кога после лошата реакција на Донарума, Ди Лоренцо погоди за 1:1.

Со овој резултат се замина на одмор, а во продолжението Наполи прв стигна до водство. Повторно лоша реакција на Донарума, а овој пат тоа го искористи Мертенс за предност од 2:1 во 60. минута.

Росонерите до бод дојдоа во 73. минута од натпреварот. Судијата Ла Пена покажа на белата точка, а сигурен реализатор беше Кеси за конечни 2:2.

За Росонерите ова е шести натпревар без пораз во првенството (четири победи и две нерешени).

Во овој натпревар нашиот репрезентативец Елиф Елмас влезе во второто полувреме и помина на теренот 35 минути.