Барса не застанува: Одбраната сака да ја засили со играч на Атлетик Билбао

Според последните информации од Шпанија Барселона тргнала по потписот на Иниго Мартинез (31) од Атлетик Билбао.

Шпанскиот стопер е голема желба на тренерот Чави, но проблем прави клубот од Билбао кој не сака да го пушти. Откупната клазула за Мартинез во договорот со клубот од Баскија изнесува 80 милиони евра.

Сумата која Барселона е спремна да ја понуди за Мартинез е околу 30 милиони евра, пренесува „Марка“.

Од претходно е позната желбата на Мартинез да се приклучи на Барселона. За него ова би била прилика за најголемиот трансфер во кариерата и му се допаѓа проектот на Жоан Лапорта. Далеку од тоа дека Мартинез не е среќен во Атлетик Билбао, но сака да ја искористи приликата да заигра за Каталонците.

Мартинез пред четири години стигна во Атлетик од Реал Сосиедад за 32 милиони евра. Договорот со Билбао му истекува следното лето. Барселона неодамна се засили со Жил Кунде од Севиља за 50 милиони евра, но тука не мисли да застане.