Анхел Ди Марија може да направи изненадувачки трансфер?

Два клуба покажуваат интерес за „Ел Фиедо“, трансфер во еден од нив би кренал голема прашина.

Како што пренесуваат француските медиуми играчот за врска на Пари Сен Жермен, Анхел Ди Марија се нашол на радарот на клубови од Италија и Шпанија.

Аргентинецот своевремено настапуваше во Шпанија за Реал, а сега се најде на радарот на нивниот градски ривал Атлетико.

Диего Симеоне ќе направи големи промени на стадионот „Ванда Метрополитано“ ова лето, одбраната ќе биде целосно реконструирана, а се бараат и квалитетни засилувања во средниот ред.

Вториот клуб кој покажа интерес за Ди Марија е милански Интер.

„Нероаѕурите“ се блиску до пласман во Лигата на шампионите и наредната сезона, имаат големи амбиции, па ова лето сигурно ќе се обидат квалитетно да се засилат.

Ди Марија со тимот на Интер на големо се поврзуваше и во текот на минатото лето, потоа нешто помалку и во зимскиот преоден рок, на крајот остана во Париз.

Сепак, големо прашање е дали Пари Сен Жермен е спремен да се откаже од Аргентинецот. Се шпекулираше дека ќе мораат да продаваат поради Финансискиот фер-плеј, но Томас Тухел наводно сака да го има Ди Марија на располагање и наредната сезона.

Како и да е останува да го почекаме летниот преоден рок и да видиме дали во овие најави на медиумите има вистина.