Зидан: Доколку Роналдо беше во форма ќе постигнеше четири погодоци

Фудбалерите на Реал го совладаа кипарски Апоел во првото коло во групната фаза од Лигата на шампионите, а тренерот на „кралевите“ Зинедин Зидан смета дека двојниот стрелец Кристиано Роналдо би направил и повеќе доколку бил во најдобра форма.

„Кралевите“ лесно се справија со Кипарците, а славниот Португалец стралаше во 12 и 51 минута од пенал. За Роналдо ова беше прв натпревар во дресот на Реал после паузата од еден месец, на која беше испратен поради туркање на судијата во натпреварот од Суперкупот на Шпанија.

Напаѓачот стигна до својот 106 и 107 гол во Лигата на шампионите, а постави и рекорд како фудбалер со најмногу успешно изведени пенали во најелитното европско натпреварување.

„Кристиано е најдобар на светот. Секогаш е тука да постигнува погодоци. Доколку денес беше во најдобра форма ќе постигнеше четири погодоци. Сите знаеме колкави се неговите можности. Среќни сме и поради тоа што не примивме погодок“, изјави Зидан.