Што би правел Челзи ако го нема? Статистиката на Еден Азар е импресивна

Најдобриот фудбалер на Челзи, Еден Азар во последно време игра во голема форма, а од почетокот на 2018. година постигна седум гола во сите натпреварувања.

Во изминативе неколку недели, Азар беше една од ретките светли точки во Челзи, а прашањето е што би било со „Сините“ доколку одличниот Белгијанец не би влегол во вистинската форма во овој период од сезоната. Во каква форма е Азар најдобро покажува статистиката. Од неговите осум последни удари во рамката на голот во Премиер лигата, дури шест завршија во голот.

Азар постигна голови против Арсенал, Брајтон (2), ВБА (2) и Вотфорд (2), а интересно е тоа што дирекно е вклучен во 53% од головите на Челзи оваа година (седум гола, една асистенција). Белгијанецот постигна шест, а сите останати играчи на „Сините“ седум гола.

Еден Азар оваа сезона постигна вкупно 15 гола, со девет асистенции на 36 натпревари за Челзи во сите натпреварувања.