Удар за Аморим: Без фудбалерот од средниот ред два месеци!

Не може без проблеми Мејсон Маунт, Англичанецот заработи нова повреда и го чека подолга пауза.

Од Англија денес пристигна потврда, Маунт поради нова повреда на задната ложа ја влоши состојбата на истиот мускул кој што го мачи долго време и го чека пауза од минимум два месеца, можеби дури и до 10 недели.

Маунт почувствува повреда на ложата во дербито против Манчестер сити минатиот викенд, а ситуацијата е многу полоша отколку што првично се предвидуваше.

Маунт ќе мора да оди на нова пауза, трета од почетокот на сезоната, бидејќи исто така имаше проблеми во текот на септември и октомври.

Да потсетиме, Маунт минатата сезона поради задната ложа паузираше сè од крајот на ноември 2023 до средината на март, а потоа повторно ја обнови повредата и за време на април и никако да се опорави и врати во вистинска форма.

Маунт сега ќе пропушти низа натпревари во сите натпреварувања, иако изгледа дека Аморим веќе се навикна да го избира тимот без него.

На ова треба да се додаде дека Аморим го прецрта Маркус Рашфорд, така што Јунајтед ќе има проблем во наредните недели во офанзивната линија…