Португалците емотивно се простија од Жота: Загубивме двајца шампиони!

Вистински шок во фудбалскиот свет пристигна утрово со смртта на Португалецот, Диого Жота кој животот го загуби во сообраќајна несреќа.

Набрзо по веста се огласи и Фудбалската федерација на Португалија која потврди и дека испратиле допис до УЕФА за минута молк на натпреварот помеѓу Португалија и Шпанија на Европското првенство во женска конкуренција.

„Португалската фудбалска федерација и целиот португалски фудбал се целосно потресени од смртта на Диого Жота и неговиот брат Андре Силва, кои ноќеска го загубија животот во Шпанија.

Многу повеќе од фантастичен фудбалер, со речиси 50 настапи за сениорската репрезентација на Португалија, Диого Жота беше извонредна личност, почитуван од сите соиграчи и противници, човек со заразна радост и вистинска референца во својата заедница.

Во мое лично име, како и во име на Португалската фудбалска федерација, изразувам најдлабоко сочувство до семејството и пријателите на Диого и Андре Силва, како и до Ливерпул ФК и ФК Пенафиел, клубовите за кои тие настапуваа.

Португалската фудбалска федерација веќе побара од УЕФА да се одржи минута молк пред почетокот на натпреварот меѓу нашата репрезентација и Шпанија, овој четврток, во рамки на Европското првенство за жени.

Изгубивме двајца шампиони. Заминувањето на Диого и Андре Силва претставува ненадоместлива загуба за португалскиот фудбал, и ние секојдневно ќе се стремиме да го одржиме нивното наследство живо“, стои во објавата.