Озбилен хакерски напад врз Ајакс, загрозени лични податоци на членовите

Во неодамнешниот хакерски напад врз Ајакс, откриени се лични податоци на стотици илјади регистрирани членови на овој европски великан.

Хакерот искористи дигитална грешка за да пристапи до чувствителни системи и на тој начин доби можност да укине активни забрани за влез на стадион и да украде илјадници сезонски билети, пренесоа холандските медиуми.

Клубот оттогаш ги отстранил безбедносните проблеми и започнал истрага. Ајакс во соопштението наведе дека „хакерот незаконски добил пристап“ до делови од клубските системи во Холандија. Оваа безбедносна грешка овозможила откривање на лични податоци од повеќе од 300.000 регистрирани членови.

Еден од најголемите холандски клубови наведе ограничен број детали, но објави дека се прегледани е-мејл адреси на неколку стотини луѓе. Како што се наведува, пристапено е до лични и чувствителни информации кои припаѓаат на помалку од 20 луѓе со забрана за влез на стадион.

Ајакс ги извести навивачите да бидат особено внимателни кога добиваат сомнителни е-пораки или пораки и никогаш да не отвораат прилози од непознати испраќачи. Нападот ја загрози дигиталната инфраструктура за продажба на билети, и повеќе од 42.000 навивачи со купени сезонски билети можеле да бидат загрозени.

Хакерот можел целосно да ги украде или да ги додели билетите за претстојните натпревари на други лица.