
Лацио продолжува да го диктира темпото во Серија А. Римскиот тим го победи Лече со 3-0 на „Олимпико“ во 12. коло и ја зацврсти лидерската позиција, задржувајќи го и статусот на еден од двата непоразени состави во првенството.
Тијани Нослин беше главниот реализатор со два гола, додека Давиде Фратези го разубави финишот со лоб за конечниот резултат. Гостите имаа свои можности, но не успеаја да го совладаат Христос Мандас.
Првиот удар Лацио го зададе во 25. минута. Густав Исаксен се проби по десната страна и нафрли, а Нослин со глава ја испрати топката во мрежата на Владимиро Фалконе.
Лече не се предаде по примениот гол. Мандас го запре ударот на Конан Н’Дри, кој ја смени насоката, а потоа и обидот на Вилем Гебелс од одбиената топка. По паузата се закани и Тиаго Габриел со глава, додека акробатскиот волеј на Амар Фатах заврши над голот.
Казната за неискористените шанси пристигна во 68. минута. По нафрлувањето на Романо Флоријани Мусолини, Кенет Тејлор со пета го проигра Нослин, кој од непосредна близина го проби Фалконе за 2-0.
Голманот на Лече потоа спречи погодок на Фратези по уште едно нафрлување на Исаксен, но во 89. минута немаше решение. Матео Канчелиери му ја отвори патеката кон голот, а Фратези го извлече Фалконе и со прецизен лоб ја заврши акцијата.
Во судиското надополнување мрежата ја затресе и Алберт Гудмундсон, кој се врати по повреда на рамото, но погодокот не важеше поради офсајд.
Убедливиот триумф дојде и покрај отсуствата на Матија Ѕакањи, Нуно Тавареш, Јосип Шутало и Адам Марушиќ. Фратези, пак, беше подготвен за стартниот состав по ударот добиен за време на репрезентативните обврски.