
Повредата на Горан Карачиќ го засени гостувањето на Зрињски кај БСК во Бања Лука. Голманот на екипата од Мостар беше пренесен во болница за дополнителни испитувања, откако доби удар со лакт во главата.
Инцидентот се случи при резултат 1:1, во дуел пред голот на гостите. Карачиќ доби удар од напаѓачот на БСК, Марчетиќ, по што остана неподвижен на тревата. Следуваше повеќеминутен прекин, а лекарската екипа му укажуваше помош на теренот.
За чуварот на мрежата натпреварот заврши во тој момент. Тој не можеше да продолжи и беше однесен во болница, па во тие моменти неговата здравствена состојба беше поважна од исходот на средбата.
Зрињски на крајот сепак ги освои бодовите. Откако играта продолжи, Антонио Илиќ погоди во 81. минута и го постави конечниот резултат 2:1 за тимот од Мостар.
Со овој исход Зрињски е на врвот на табелата по 14 одиграни натпревари, со само еден пораз и едно реми. Зад него е Борац од Бања Лука, кој исто така има по еден пораз и нерешен резултат, но и два меча помалку. БСК се наоѓа на петтата позиција.