Мареска во Челси добил отказ поради Манчестер Сити?!

Енцо Мареска повеќе не е тренер на Челси. Италијанецот го напушта Стамфорд Бриџ по само 18 месеци, а капката што ја прели чашата се неговите разговори со луѓе поврзани со Манчестер Сити околу потенцијалното наследување на Пеп Гвардиола, објави The Guardian.

Несигурноста ја оптоваруваше Челси откако минатиот месец се забележаа нарушувања во односот на Мареска со управата, но на Стамфорд Бриџ владееше чувство дека Италијанецот бара излез пред официјалното разрешување во четврток наутро. Мареска веќе се простил од персоналот и играчите, а неговото заминување доаѓа пред неделното гостување на Челси токму кај Манчестер Сити.

Ситуацијата стана нестабилна откако Мареска даде мистериозни изјави за доживување на неговите “најлоши 48 часа” во клубот по победата над Евертон на 13 декември. Иако тие коментари беа обвиени со тајна, сега е познато дека Мареска на своите шефови – двапати крајот на октомври и повторно по натпреварот со Евертон – им признал дека разговарал со лица поврзани со Сити.

Тема била преземањето на тренерската позиција ако Шпанецот замине на крајот од сезоната, со оглед на тоа дека Мареска му беше асистент на Гвардиола во Сити во сезоната 2022/23.

Иако постоеше незадоволство од одлуките на Мареска за време на натпреварите, поголем проблем беше неговото однесување надвор од теренот. Извори велат дека конфликтот настанал поради неговиот притисок врз клубот да му дозволи игнорирање на советите на медицинскиот тим за заштита на одредени играчи.

Челси воведе строга политика на ротација со цел да се спречат повреди, и беше речено дека главниот тренер не може да ги надгласа одлуките на медицинскиот оддел. Целта беше да се заштитат играчи како Рис Џејмс, Педро Нето и Весли Фофана, кои во минатото имаа проблеми со повреди. Кол Палмер, најдобриот играч на Челси, исто така оваа сезона се соочил со повреда на препоните и моментално не може да игра три целосни натпревари неделно.

Расположението на Мареска не се подобри по критиките поради лошите резултати што следеа по ротациите. На пример, направи големи промени во тимот за време на шокантниот пораз од Лидс и поразот од Аталанта во Лигата на шампионите.

Од друга страна, во клубот не беа задоволни од фактот што капитенот Рис Џејмс, и покрај историјата со проблеми со коленото, минатиот месец одигра три целосни натпревари во само една недела.