Чудесен настап на Дончиќ: За 39 минути постигна 38 поени!

Кошаркарите на Лос Анџелес Лејкерс извојуваа нова победа во неизвесна завршница, совладувајќи ги градските ривали ЛА Клиперс со резултат 125:122.

Средбата беше во знакот на брилијантната игра на Лука Дончиќ, најзаслужен за успехот, иако Лос Анџелес Лејкерс искусија значаен пад во третата четвртина, кој за малку ќе доведеше до целосен пресврт.

По паузата заради Ол-стар викендот, Лука Дончиќ покажа колку му недостасуваше теренот. Лејкерс блескаво го стартуваа мечот, постигнувајќи дури 41 поен во првата четвртина (41:30). Словенечката ѕвезда ја диригираше играта со четири тројки во првите 12 минути, заедно со прецизни асистенции и лесно прекршување на одбраната на Каваи Леонард.

Иако Лејкерс доминираа во првото полувреме, во третата четвртина доживеаја необјаснив пад во играта. Клиперс направија неверојатен пресврт од 17-1 и поведоа, а тренерот на Лејкерс, Џеј-Џеј Редик, се најде под критики од навивачите зашто дозволи предноста да се стопи без земање тајм-аут.

За среќа на Лејкерс, Дончиќ го запре налетот на Клиперс – се држеше топката во свои раце, погоди две брзи тројки и ја врати предноста на својот тим.

Последните 12 минути донесоа борба на секој поен. Клиперс не се предаваа и покрај одличната вечер на Дончиќ и инспирираниот Остин Ривс. Сепак, надежите на Клиперс за победа беа уништени кога Каваи Леонард (кој до тој момент постигна 31 поен) мораше да го напушти теренот поради повреда. Лејкерс знаеја како да го искористат неговото отсутство и рутински ја завршија средбата во своја корист.

Лука Дончиќ за 39 минути на теренот постигна 38 поени (со удар 11/25, тројки 8/14) и оствари 11 асистенции, Остин Ривс додаде 29 поени, а Леброн Џејмс забележа двоен ефект (13 поени, 11 асистенции).

Во редовите на Клиперс, Каваи Леонард беше најистакнат со 31 поен, додека Бенедикт Матурин внесе 26 поени.